புளியங்குடியில் பரிதாபம் . நீச்சல் குளத்தில் குளிக்க சென்ற சிறுமி நீரில் மூழ்கி பலி , உறவினர்கள் கதறல்.

புளியங்குடியில் பரிதாபம். நீச்சல் குளத்தில் குளிக்க சென்ற சிறுமி நீரில்  மூழ்கி பலி, உறவினர்கள் கதறல்.

புளியங்குடி, அக் . 7, புளியங்குடி அருகே நீச்சல் குளத்தில் பெற்றோருடன் குளிக்க சென்ற சிறுமி நீரில் மூழ்கி பலியான சம்பவம் சோகத்தை ஏற்படுத்தியுள்ளது.

புளியங்குடி அருகே ரத்தனபுரியை சேர்ந்தவர் ராஜேந்திரன் [40] - இசக்கியம்மாள்  தம்பதிகள் . ராஜேந்திரன் கூலி வேலை செய்து வருகிறார். இவருக்கு காவ்யா, கன்சிகா என்று இரண்டு மகள்கள் உண்டு. இதில் புளியங்குடி அரசு பள்ளியில்  காவ்யா, 12 ஆம் வகுப்பும்  கன்சிகா ரத்தனபுரி ஊராட்சி ஒன்றிய துவக்க பள்ளியில் 4 ம் வகுப்பும்  படித்து வருகிறார். நேற்று மதியம் ராஜேந்திரன் தனது மகள்கள், உறவினர்கள் மற்றும் அவர்களின் குழந்தைகளுடன்  அருகிலுள்ள தனியார் நீச்சல் குளத்தில் குளிக்க சென்றுள்ளார். 

குழந்தைகள் ட்யூப் மூலமாக நீச்சல் அடித்து கொண்டு குளித்தவாறு  இருந்தனர். இதில் எதிர்பாராதவிதமாக கன்சிகா நீரில் மூழ்கினாள் . உற்சாகமாக குளித்து கொண்டு இருந்த பெற்றோர் மற்றும் உறவினர்கள் யாரும் கவனிக்கவில்லை. சிறிது நேரம் கழித்து குழந்தையை தேடும் போது குழந்தை நீரில் மூழ்கி இருப்பதை கண்டு அதிர்ச்சியடைந்து குழந்தையை புளியங்குடி தனியார் மருத்துவமனைக்கு தூக்கி சென்றனர். அங்கு குழந்தை ஏற்கனவே இறந்து விட்டதாக தெரிவித்ததை அடுத்து புளியங்குடி அரசு மருத்துவமனைக்கு அனுப்பி வைத்தனர்.  

அதனை  தொடர்ந்து புளியங்குடி இன்ஸ்பெக்டர் பாலகிருஷ்ணன் தலைமையிலான  போலீசார் வழக்கு பதிவு செய்து  பிரேத பரிசோதனைக்கு நெல்லை அரசு மருத்துவமனைக்கு அனுப்பி வைத்தனர் பெற்றோருடன் குளிக்க சென்ற சிறுமி கண் முன்பே நீரில் மூழ்கி பலியான சம்பவம் ரத்தனபுரி பகுதி மக்களை சோகத்தில் ஆழ்த்தியது.